LITERATURA DE LA KULA I LA MUJER!

Este poema de Sharope Blanco muestra un matiz de los muchos del Pueblo Judio, el de quienes aún conservan el ladino:

LITERATURA DE LA KULA  I LA MUJER!

 

LOS PALESTINYANOS NO KEREN DOS ESTADOS, UNO PALESTINYANO I EL OTRO  ISRAEL !
Pashayikos…. A la buena hora…. Ni yo kero del todo ! Houstttttttt  ha hutsa !

 

Ya saves komo los Amerikanos
-I por seguro los Israelyanos-
AMOSTRAN  sus penseryos
En este modo de kavzos !…
No keren solusyones ! No, no  mi alma…
Ke miren los por sientos i agan matematika !
Keren TEL-AVIV i los judyos en tavlas !
No ayegaran ni sus guesos ni sus almas !
I ke no puedan alevantarsen ni de sus kamas !
Guay de mozotros por los leaderes ke tenemos  !
Se kreyen dayinda en Papa Noel !
Mazal ke no dizen a dingunos
Ke las roketas son meteores,
I los mortajes mantel …

I este arrankado de Greenberg, torobolos !
Ande pensa avrir la eskola para edukarlos ?
En Azza o en el Azazel ?
I ke les va ambezar ?
A englutir sus fiel ?

Tanah, meldar i eskrivir i Historya ?
No echar piedras, no matar i Geografya ?
Lo van a espidir kon keyf a la primera lisyon !
El ke va entrar kon su amigo le va kortar el garon !
Buen desmeoyado ! Vaziyo komo un bidon !
I Peres parese ke lo bolo kon los anyos !
Ke vayga i ke se arresfreske en los banyos !
Ken los engodresyo i se izyeron gayos lokos ?
Los fuyeron i assasinaron muestros mansevos !

Basta de komer chanchas, pipitas i kashkaras !
Pasaremos al TAHLES !
Desha las bavajadas !
Solusyon dize ! Ke solusyon bre ?
Keren tu kaza ! Solusyon de sus pulgas !
Se asentaran en tu meza !
( Offffffffff ezbafi ! Me esto inyervando ! )
Pedronansas de pekados ! No dishe nada !
Agora me esto indo presto a lavar mi boka !
Esto se yama alta literatura de la KULA..
Ken es ke estava pensando
Ke no so ke un gatiko,
Una pisika de kaza
Ni toka ni peka ?
Bueno… Deke no ?  Esto tambien…
No se save lo ke los diyas trayen.

La  mujer es komo las aguas de la mar !
A vezes es azeyte, da ganas de nadar.
Supito olas s’alegran, dan plazer al mirar
La tempesta se ve del horizonte, al leshos
La mar s’aunfla, los profundos son aleskuros
Kon el ayre del norte es komo si tiyene friyos…
Se oye un estranyo silensyo
Saves entre ti ke es falso
Las estreyas te yaman
Las miras, sientes ke te aman
Blankas espumas se forman..
Ande fuyeron las estreyas ? Mas no estan !
Nuvlas se arrekojeron, solo menasan !

 

Asperas el primer grito del sielo
La detonasyon de un immenso kanon
El espanto de un largo tirguelo en misyon !
Ma antes… Te enteza una luz ke ensyega!
Parese kucheyar las nuvlas.  Es la alampara !
Las olas atakan agora, rompyeron sus kadenas
No tienen piadad, se olvidaron de sus promesas,
Vuestra aliensya,  kuando por primera vez salites
Le dates tu konfiensya, te dyo bezos i la amates.
Siempre no egziste… Todo tiene ke eskapar !
Son horas, diyas, la felisitad se va a repozar …
Se kansa presto o no tiene tiempo para asperar !
Bola de la ventana ma torna,  nunka te va  olvidar !

 

Mi mamita diziya por una syerta mujer
” ES DRAGA DE MONTANYAS “, kale ver !
Todo depende del estado de la persona…
Ke venga a ver su flor, su ijika regalada,
Una prensesa ke solo la korona le mankava !
La ke engrandesyo kon leche i sharope
para ke se aga blanda, blanka i dulse.

 

Komo la espuma del vino ke s’envejese
Kon kremas freskas, manteka i miel,
I fostanes brodados, kon volanes de dantel
Kon platos de porselana i kucharas de plata
Para ke tenga el ojo arto i buena kultura !
Kon almadas de seda en kamikas de pluma,
Para ke sepa lo ke es lo bueno i lo ermozo
I no kera nada de lo ke no esta perfekto !

 

Guay guay ke no tiene mas nada de esta ijika !
Ande s’eskonden sus jugettes i akeya kukla
Ke diziya “mammma” kuando la alevantava ?
No egzisten mas sus jupones de prinsessa,
Sus buklas blondas,  ni su dulse innosensya

 

Guay guay ke se izo zingana de las kayes !
Pyes deskalsos, biyervos de lado, mirala si keres !
Una roza en sus kaveyos largos, ojos d’almendra,
Una Carmen fuego i flama, kreatura dayinda….
Ma una tsionista tambien kon su pluma komo espada !

Sharope Blanco el 10-08-2011 en eSefarad  http://www.esefarad.com/?p=25667

http://es.scribd.com/doc/19723105/Diksionario-Djudeoespanyol-Caste-Llano

http://www1.dpz.es/dipu/areas/presidencia/sefarad/NUEVO/ESP/actividades/2004/publicaciones/diccionario.pdf